· مقدمة:
لمن يطمح أن يبني نفسه ..أضع بين يديه بعض الأفكار ولكنها تحتاج للعزيمة والإصرار والتحمل لأن الهدف في غاية الروعة ... ويكفيك أن توعد نفسك وزوجتك على هذه الصفات الجميلة من تخطيط وعزيمة وإصرار .. لكن هناك أمرين مهمين:
1. نية هدفك تكون خالصة لله لأن الهدف أسرة جميلة مطمئنة مستقرة وما أجملها من نية .
2. مصارحة زوجتك بالهدف وما يترتب عليه من مصاعب وقتية لتحقيقه من قلة المصروف ونحوها، ولمن يفكر في الزواج يجب أن يصارح زوجته المستقبلية بهذا الهدف وما يترتب عليه قبل أن تتم الملكة فالصراحة والوضوح والمناقشة السليمة والأهداف الاستراتيجية من أهم سمات الزواج الناجح.
· قبل الزواج (مشروع الزواج سنتين):
في البداية توك متخرج من الجامعة وتوظفت وراتبك 7500 لا تفكر بالزواج حالياً ابدع في وظيفتك وأستغل نقص مهاراتك من لغة ونحوها ، 5000 ضعها في حساب ادخاري لا تحركه حتى يأتي زواجك ويفضل بعد سنتين تكون قد اقتربت ترقيتك وسيزيد راتبك ، ووقتها 5000*24=120000... وهي قيمة المهر والشبكة و شهر العسل ، بالإضافة إلى العانيات ومساعدة الوالد قد يكون لديك فائض تجعله مبلغ احتياطي لأي أزمة خلال ال 15 سنة ولا ننسى قرض بنك التسليف 45000 بدون فوائد تستطيع دفعه كدفعه أولى لمشروعنا القادم .. مع العلم أني لم أدخله في الحسبة ولا أي حوافز تأخذها من العمل أو هدايا او ورث او نحوها ( تخرجت وعمرك 23 سنة تزوجت بحر مالك وعمرك 25 سنة).
· بعد الزواج (مشروع تملك منزل خلال 15 سنة):
المثال ~ راتبه بين 12 الف إلى 14 الف ~ :
استفسر من عدة بنوك وممكن أفضلها الإنماء من ناحية القروض العقارية .. اعتقد بيطلع لك مبلغ قرض سكني صافي بين مليون ومئتي الف إلى مليون ونصف لمدة 25 سنة -30 سنة والقرض الاجمالي بين مليونين وميتين الف الى مليونين وست مئة الف تقريباً (بمعنى مليون وشوي فوائد على 25-30 سنة)..
دور لك بيت لا تهتم بالحي كثير الاهم البيت موفره جنبه كل الخدمات وبمكان قريب من عملك وأعمال الناس أن حصل .. البيت يكون تصميمه دور أرضي كبير " تسكنه أنت والمدام وعيالكم خلال 10-15 سنة لين ينتهي مشروعكم" ومفصولة عنه شقه صغيره .. الدور العلوي شقتين كبار .. السطح يحتوي شقة كبيرة .. أجر الشقق بعقود خمس سنوات ملزمة بشرط جزائي وكن صارم مع المستأجرين (فائدة الخمس سنوات للمؤجر في حال قرر الانتقال المستأجر يدفع شرط جزائي اجار ستة أشهر وفائدة للمستأجر بأن لا يزيد الآجار).. مع العلم أني سأحسب الآجار بمبلغ متوسط لمدة 15 سنة بمعنى الزيادة في الاجار ونحوها تقلل مدة المشروع.. كذلك مهم جدا لا تلمس البيت تعديل تزيين بس دورك رتبه ولا تتكلف واجد فيه .. والكهرب والمويه كل مستأجر يكون عداده لحاله وترتاح "إن أمكن".
الحسبة:
الآجار >>> شقة صغيره أرضية = 20 الف بالسنة.. ثلاث شقق كبار علوية=75 الف بالسنة .. الإجمالي=95000 بالسنة تقريبا قد تقل 5000 او تزيد..
الإجمالي بعد 15 سنة = 1425000 ... مبلغ ممتاز جداً وبيت ملك .. وما حسب القرض من الصندوق العقاري او أي حوافز بالعمل خلال ال 15 سنة فهي بالتأكيد ستقلل المدة وقد تكون مبلغ احتياطي للزمن (احفظ قرشك الأبيض ليومك الأسود هههه )..
بيتك بعد 15 سنة تعبان وقديم راح يجيب لك أقلها مليون والاغلب دون المليون ونصف وما تدري ممكن حي يكون مرتفع المتر فيه ويحقق لك مكسب خيالي.. راح اعتمد على انك بعته ب 1375000 ..
الاجمالي = 1425000+1375000=2800000 .. واوووووووو ... 2600000= بيت مميز جداً مساحته 500 متر في أفضل الأحياء وممكن أعلى او اقل بقليل... وراح تشتري سيارة ب 150 الف وسفره مدتها شهر ونص ب 50 الف مع الهدايا (بس السفرة يخطط لها قبل بست شهور أرخص للتذاكر والسكن)..
مبلغ القرض المقطوع من الراتب الشهري= 6000 ويتبقى 6000 ريال تنزل لك شهرياً.
6000 نقسمها شهريا على مصروف للزوج وللزوجة فواتير الكهرب والهاتف والجوال ..المواد الغذائية والمواد الاستهلاكية والغسيل والكوي بالمغسلة (ندلل الزوجة ههههههه) ونبقي مبلغ عشان سفره خارجية كل سنتين او للحاجة...
مصروف الزوج =1000ريال مع أنه كثير جداً لأنه غالب الوقت بالدوام 8 ساعات ما راح يصرف الا وجبه وحده لن تتجاوز 20 ريال يومياً .. مع أن الأفضل تجيب فطورك معك من البيت ولا يكلف شي لأنه مهما وفرت أفضلك خصوصاً في أمور ممكن تعوضها ولا تفرق معك كثير (20*20يوم عمل =400)..ممكن توفر هال400 لكن أنا حسبتها.. وممكن تصرف في موضع أخر أهم بالنسبة لك أنت اللي تقرر...لكن نقدر نقول أنه بيعزم أصحابه مره بالشهر وبيعزم زوجته مرتين بالشهر او أكثر(كل عزيمة مفروض ما تتجاوز 150) =150×3=450 .. بيتبقى من الالف 150 ريال لأي ظرف ..
مصروف الزوجة=1000ريال في جيبها اذا كانت طالبة او ربت منزل وحتى موظفة افضل تعطيها لأن لها حق بالمصروف وهذا شي أساسي ولها الحق في التصرف فيه ولا تملي عليها أي شي بس توجهها وتنصحها .. الزوجة ما اعتقد لها مصرف بالطلعات مع الزوج وممكن هي تعزمه في يوم معين..وممكن تعزم صديقاتها في بيتها وهي ترتب كل شي والحلا والفطاير ما يكلفها 200 ريال واحلا من أي طلعة ... انا متأكد تقدر توفر 400 ريال شهريا من هالمصروف هال 400 *12شهر =4800 تشتري فستان او عقد او او هدية لزوجها او لوالديها أي كان هدفها..
الفواتير =1500 ريال (وهذا اعلى شي حسب الدور اللي انت ساكنه يعني ممكن يبقى فائض منه من 200-500 ريال) .. الماء بيكون 50 ريال شهرياً الكهرب ان طق طق بالدور الأرضي اللي انت عازل منه شقه مالك علاقة بكهربها بيكون مبلغها 550 بالصيف 300 بالشتاء وراح احسبها ب600 شهريا(هذا فائض يكون لك احتياطي وقت الزنقه خخخ او تخصص هالاحتياطي اللي اتوقع يكون كل سنة 5000 ريال ..ماله علاقه بالقرض ولا المصاريف الشهرية .. وتخصصه كهدية لزوجتك يوم زواجكم مع حفلة صاخبه هههههههه ..وكذلك هدية لوالديك ووالديها..(والهدية ليست بقيمتها أنما بمعناها).. تشترك بجود بلس وتستخدم النت واي مكالمات في البيت لأي جوال او بيت في المملكة وانتبه تستخدم جوالك بس تخليه استقبال وخارج البيت تستخدمه .. فاتورة جود بلس 300 ريال شهريا .. فاتورتك وحرمتك لن تتجاوز 300 ريال شهريا=600 ريال للنفر هههههههه... الاجمالي=600+300+50+550=1500ريال.
المواد الغذائية والاستهلاكية= 1000 ريال كل خميس أو جمعة في اول النهار يكون لك ولزوجتك مشوار تفطرون برا في أحد الاسواق ويكون بالسوق هايبر ماركت ... تتقضون منه خضاركم وفواكهكم بالحبة يعني بالاسبوع مستحيل تاكل كل يوم برتقاله او كل يوم تفاحه او موزه لو كليت بتاكل حبه حبتين وتنوع (خذ اربع برتقالات ومثلها تفاح وموز وأي فاكهه معينه بس بالحبه لأنكم شخصين وحرام تنكب لو حبه ) وطبق هالشيء على الرز لا تاخذ اطلق نوع المهم نوع جيد ويوفرلك ونفس الحكاية على الاغراض الباقية ومو لازم كل يوم لحم ولا دجاج ... يوم دجاج ويوم خضار بس ويوم لحم ويوم برا بتاكلون ويوم ببيت أهلها واهلك وقضى الاسبوع.. كل أسبوع فطور دسم وتمشيه ساعتين او اكثر بالهايبر وسوالف ودردشة بينكم خخخ =200-250 ريال اسبوعيا... ولا تحاول تتقضى بغير هاليوم لو شي بسيط انسى لا تحاول بس خذ خبز كل يوم وهذا ما يكلف الا ريال يوميا... ولا بينضرب تخطيطنا ترا المية تفرق معنا وكل فائض بتحتاجه بهدايا تفرح زوجتك واهلك ووالديك ولا تفرجلك أزمة أو تتصدق فيه..
الغسيل والكوي =400 ريال شهرياً -100ريال اسبوعياً هذا اكثر شي ..
الإجمالي " 4900" الراتب "6000" = 1100 ريال متبقي ..وكل أساسياتك قضت ... تجيب حصالة ما احد يقدر يفكها هههههههه وتحط فيها 700 ريال شهريا واي فائض تجدعه فيه مع الفوائض أعلاه بيجيك 9-12 الف سنوياً ممكن تستقطع الفين ثلاثة لبعض المناسبة والصدقات .. والباقي تخليه لفائض السنة التالية وتسافر فيه اسبوعين لشهر خارجياً..
v مهم جداً :
فلوس الآجار بحساب بنكي آخر ما ينلمس الا بعد 15 سنة لأن عندنا احتياطي سنوي لا باس فيه.
ممكن يختلف راتبك عن المثال السابق لكن بدال بيت بمليون ونص خذ بمليون او اقل بحي قديم وتحمل البعد والمشاوير لهدف جميل جداً .. لكن مشروعك يحتاج لشروط:
1. بيت يتكون من دور أرضي لك كسكن وأربع شقق أخرى تأجرها.
2. حساب بنكي خاص بالآجار لا يمس أبدا حتى 15 سنة قادمة.
3. حصالة بالبيت كل نهاية سنة تفتحها وتشوف العجب ههههههههه.
طبعاً الافكار اللي طرحتها لازم لها شروط:
§ القناعة.
§ الصبر .
§ التحدي .
§ التخطيط .
§ وضوح الهدف .
§ سياسة الشراء كل ريال انصرف تعرف وشوله لكل الزوجين.
v مهم جداً:
الحياه صعبه جدا لكن حنا نصعبها اكثر.. مهم انك تعلم شريكة حياتك بهالشي من وقت الخطبة اذا فعلا تسميها شريكة حياتك.. اذاً للي ما تزوج مهم تدري خطيبته بهدفه قبل الملكة جداً مهم.. واللي متزوج حالياً يناقش زوجته واكيد بتكون فيه قناعة وكل واحد يساعد الثاني أذا كانوا فعلاً يحبون بعض..
عموما الفكرة اللي حطيتها صعبه مره لكن مو مستحيلة وتتملك بيت فخم في بداية الاربعينات غير عن الستينات او ما تتملك ابد فلازم زوجتك تعرف بالهدف..
" مجرد فكرة ومشروع مهم لكل زوجين حالياً او مستقبلاً"
مع العلم أني ما حسبت تدخل الزوجة أو الوالد أو قروض العقاري ونحوها ..طبعا فيه أفكار للزوجة تكون لها دخل خاص فيها حتى لو ما كانت موظفة ومن خلال البيت وكل زوجة لها هوايات ومهارات مختلفة يطول الشرح لذكرها لكنها مفيدة جداً وتساعدها في شراء حاجيات كمالية لها أو لزوجها ..
ليست هناك تعليقات:
إرسال تعليق